BAŞ SAĞLIĞI

 

Əziz həmvətənlər,


Yayılan acı xəbərə əsasən, cümə günü 24 oktyabr, Əhər caddəsinin Xoca məntəqəsində mühəndis Qulamrza Əmani iki qardaşı ilə avariaya uğrayıbdır və hər üçü həlak olublar. Bu acı xəbər, fəal azərbaycanlıları – o cümlədən Güney Azərbaycan Konqresinin üzvlərini şiddətlə kədərləndirdi. Xüsusən ona görə ki, mühəndis Qulamrza Əmaninin, 1995-96-cı illərdən Azərbaycan Milli Hərəkatının sıralarında həm tələbə hərəkatında və həm də bəzi seçkilərdə Güney Azərbaycan xalqının milli haqlarının dilə gətirilməsində böyük zəhməti olmuşdur və elə buna görə də fars şovinizminə qulluq edən İran İslam Respublikası, onu bir neçə dəfə həbsə almışdı. O, 4 il həbsini bitirdikdən sonra da Azərbaycan xalqının milli hüquqlarını əldə etmək üçün mübarizəni davam etmişdi.

 

Azərbaycan xalqına və beynəlxalq təşkilatlara aydındır ki, İran Rejiminin, həm Şah dövründə və həm də Cumhuri İslami dövründə öz müxaliflərini aradan aparma yollarından biri, avariaya salmaq, duvar altına qoymaq, qazla boğmaq və suda batırmaqdır.

 

Biz, Güney Azərbaycan Konqresi olaraq, mühəndis Qulamrza Əmani və onun qardaşlarının avariaya düşməsini şübhə ilə qarşılayaraq, bunun diqqətlə, səlahiyyətli orqanlar – o cümlədən beynəlxalq təşkilatların nümayəndələri və KİV jurnalistləri tərəfindən araşdırılmasını rica edirik. Və elə ona görə də birinci növbə həmin orqanlara məktub yazıb, hadisəni geniş araşdırıb qərar çıxarmaq üçün onlara müraciət etmişik. İndi isə, bütün Azərbaycan fəallarına üz tutaraq, gələcək bu kimi hadisələrin baş verməsinin qarşısını almaq üçün əl-ələ verib, birgə kampaniya və müştərək mübarizə aparmağa çağırırıq.

 

Bugün, mühəndis Qulamrza Əmani və onun qardaşlarının itgisini, onun həyat-yoldaşı Xurşid xanım və balaca oğlu Araza, Əmanilərin valideynlərinə, qohumlarına, dostlarına və başda Azərbaycan xalqına təsliyət deyirik. Ümid edirik ki, onun dəfn mərasimi, Qulamrza Əmaninin Azərbaycan xalqına göstərdiyi xidmətlərə layiq təşkil olunacaqdır.

 

Dərin hüznlə,

 

Güney Azərbaycan Konqresinin Mərkəzi Komitəsinin Birinci Məsulu          
Abdulla Əmir Haşimi (Cavanşir)        
24.X.2008

 


© Güney Azərbaycan Konqresi, 2006- .

Səhifədə yerləşdirilmiş hər hansı materialdan istifadə olunduqda, istinad vacibdir.

#aaaaa